Thursday, October 29

अमेरिकी राष्ट्रपति चुनावः जो बिडेनको लोकप्रियता बढ्दै, ट्रम्पको सम्भावना केवल १० प्रतिशत

July 5, 2020 143

काठमाडौं। आगामी नोभेम्बरमा हुने अमेरिकी राष्ट्रपतिको निर्वाचनमा डेमोक्रेटिक पार्टीका उम्मेदवार जो बिडेनको पल्ला भारी देखिएको छ । कोभिड–१९ को प्रकोप सुरु हुनुभन्दा पहिले अर्थव्यवस्थाको तीब्र गतिका कारण हालका राष्ट्रपति डोनाल्ड ट्रम्पले जित्ने सम्भावना अत्याधिक देखिएको थियो । तर, कोभिड–१९ महामारीले ट्रम्पको लोकप्रियता ह्वात्तै घटाइदिएको छ । द इकोनोमिस्टको चुनाव मोडलले अहिले ट्रम्पको चुनाव जित्ने सम्भावना केवल १० प्रतिशत भएको देखाएको छ ।

फ्लोरिडा, मिशिगन र भिस्कन्सिनजस्ता कडा प्रतिस्पर्धा हुने राज्यहरुमा जो बिडेनको स्थिति सुदृढ छ । पाका मतदाताहरुको बीचमा पनि उनले धेरै समर्थन पाइरहेका छन् । आश्चर्यको कुरा कलेज नजाने श्वेत मतदाता पनि उनीसँग जोडिएका छन् । कोरोनाभाइरसले धेरै मतदाताहरुलाई यो महसुस गराएको छ कि ७४ वर्षका ट्रम्प राष्ट्रपति पदका लागि योग्य छैनन् ।

नोभेम्बर आउन अझै ४ महिना बाँकी छ । यो अवधिमा कोरोनाभाइरस नियन्त्रण हुँदै गयो र अर्थव्यवस्था सुधार हुँदै गयो भने ट्रम्पको स्थिति बलियो हुँदै जान सक्छ । तर, यदि भाइरसको भीषण प्रकोप जारी रह्यो र हुलाकबाट मतदानको लागि पर्याप्त व्यवस्था गरिएन भने कम भोटिङका कारण नतिजा अप्रत्याशित हुन सक्छ । यद्यपि स्थिति जस्तोसुकै भए पनि ट्रम्पले यसअघिजस्तै विभाजनकारी तरिकाको फाइदा उठाउने कोसिस गर्नेछन् ।

जो बिडेन ७७ वर्षका छन् तर ट्रम्पको भन्दा धेरै उमेर भएकै कारण यो मुद्दा उनको विरुद्ध जाने छैन । उनी उपराष्ट्रपति रहिसकेका छन् । उनी १९७२ मा ३० वर्षभन्दा कम उमेरमा सिनेटर बनेका थिए । सर्वेक्षणमा डेमोक्रेटिक प्रभावका राज्यहरु मिशिगन, पेन्सिल्भेनिया, भिस्कन्सिनमा बिडेर धेरै अगाडि छन् । एरिजोना, जर्जिया र टेक्ससजस्ता रिपब्लिकन प्रभाव भएका राज्यहरुमा पनि उनी कडा प्रतिस्पर्धामा छन् । अनुभव विनम्रता र मध्यमार्गी झुकाव बिडेनको स्थितिलाई बलियो बनाउँछन् । मानिसहरुलाई यो पनि लाग्छ कि बिडेन अमेरिकाको पुरानो स्थिति बहाल गर्न सक्छन् ।
source:DCnepal

प्रतिकृया दिनुहोस्